الجمعة، 5 مارس 2010

أنا بحب..دي فيهــا حاجــــة!!


من غير مقدمات..أنا بحبه أوي أوي أوي..والله بحبه وبعترف للعالم إني بحبه

بتحبوه؟؟

أنا مش بغير من حد..اللي بيحبه يقول عادي

بس استنوا: اللي بيحب حد دايما بيبقى مهتم بيه وبيتابع أخباره أول بأول..واللي مش بيتابع معلش..يبقى مش بيحب بجد

صح؟

المهم حبيبنا دا في خطر..عارفين يعني إيه في خطر؟

بتحبوه يا عالم!!.., بتحبوه بجد؟؟ طب لو بتحبوه ساكتين ليه؟!!

هو والله مش ملك الفلسطينيين لوحدهم

دا بتاعنا كلنا..لأنه حبيبنا كلنا

حبيبنا"المسجد الأقصى" في خطر

والله في خطر

يوم 16\3 احتمـــــــــالية كبيرة يهــدوا جزء من المسجد الأقصى

عارفين يعني إيه يهدوا جزء منه؟ واحنا لسه منا اللي مش عارف أخبار الأقصى!

أرجوكم..أرجوكم..أرجوكم كفاية قسوة وسلبية

دا من ضمن مقدساتنا

دا بيت ربنا..ومش أي بيت يا بنات..مش أي بيت والله دا من ضمن ما لا تشد الرحال إلا إليه ودا مسرى الرسول صلى الله عليه وسلم

يااااااه..بقالنا كتير بجد مش بنفكر غير في نفسنا وفي حياتنا ومشاكلنا ومذاكرتنا ومحاضراتنا وشياكتنا

طب والأقصى بتاع ربنا؟؟

ردوا عليا

هنقله معلش احنا مش فاضيين

إنت مش مهم عندنا؟

شوفلك حد تاني!!

لأ..لأ وألف لأ

مش احنا اللي قلبنا كدا..ولا احنا اللي ديننا علمنا كدا..ولا دا اللي عرفناه عن رسولنا

احنا مش مسلمين بالاسم..مش مسلمين بالوراثة

احنا مسلمين بالعقل والقلب والجوارح والاحساس

قومـــــوا .. اتحركــــوا أنا قلبي بيهتز

أنا شايلة قضية أمة..أنا عارفة أنا اتخلقت ليه

أنا مش هنا عشان ألعب..أنا هنا عشان عندي رسالة وهدف

مش هسكت..أيوا والله مش هسكت

قوموا قولوا معايا مش هنسكت..حركوا قلوبكم..حركوها دي قلوبنا اتحجرت من زمن

قوموا ندور ونفكر ونلف ونبتكر عشان اللي بنحبه

حبيبنا غالي يا عالم..حبيبنا غالي والله غالي

حبيبنا مش رخيص

حبيبنا بيتهان واليهود دخلوا يعملوا شعائرهم فيه

المرابطين جوا الأقصى بيتبهدلوا ..بس دي ناس بتحب بجد

ناس ممكن تموت عشان ربنا اللي بيحبوه

فكرت ممكن نعمل إيه وطلعت بالأفكار دي..ولازم نطبقها إن شاء الله:

1-ننشر حملة نغمات للأقصى على الموبايلات

2-هنكلم أي حد عن موقف الأقصى الحرج وهنتابع الأخبار أول بأول

3-هندعي..بس هندعي بجد ومن قلبنا في كل صلاة

4-هنقاطع..هنقاطع..هنقاطع عشان حبيبنا الأقصى

5-تعالوا نبطل ذنوب..اللي بيحصل دا بذنوبنا اه والله..لأن البلاء مش بينزل على أمة غير بذنوبها..وذنبي على ذنبك على ذنب غيرنا وغيرنا عملوا جبل يهود بيضر حبيبنا..تعالوا نبطل غيبة وكلام مش مفيد وتعالوا نلبس لبس بجد يرضى ربنا ونعيش لهدف..هدف حقيقي هدف يوصل للجنة

**

ماذا نقول..إذا التقينا بالرسول؟

هنقله إيه؟

هنقله يا هل ترى؟ شفت اللي للأمة جرى؟

شفت البشر!! وقلوب أشد من الحجر!!

والشمس تشهد والقمر! صابرين على حكم القدر

هنقله إيه؟؟ هنقله إيه؟؟

يلا..أرجوكِ يلا..إنتِ لسه هتفكري!.. لأ..لأ..أكيد قررتي..الأقصى بينادي..معقولة لسه مش سمعاه؟.., لو فتحتي التلفزيون هتسمعي صوته بينادي علينا

صدقيني..قلبك لسه بخير..لسه فيه رحمة ونخوة..بس إنتِ إوعي تفكري في نفسك وبس

خليكِ زي رسولنا صلى الله عليه وسلم ..فكري في أحوال الإسلام..يـــلا بقى..الأقصـــــــــى في خطـــــر والاقتحامات شغــالة

لبيك يا أقصــــى..لبيك يا أقصـــــى..لبيك يا أقصــــى

استني هتحطي الورقة دي فين؟..,مظنش إن قلبك هيخليكِ ترميها أو تقريها بدون اهتمام..يلا قولي معايا"لبيـــك يا أقصانــــا..لبيك يا أقصــــانا"

رسالة من طالبة بتفكر في حال أمتها

ومش هتبطــــــل...

هناك 6 تعليقات:

صاحبة هدف يقول...

انشروها

ومن يستطيع تصويرها وتوزيعها على البنات في الكليات..فجزاه الله خيراً

تصور في ورقة واحدة فقط وجه وظهر

غير معرف يقول...

جزاكم الله خيرا

استأذن فى وضعها فى منتدى البركة

دمتم بخير

shyama يقول...
أزال المؤلف هذا التعليق.
صاحبة هدف يقول...

بالطبع تفضلوا بوضعها دون استئذان

جزاكم الله خيراً

الفاروقة يقول...

جزاكم الله خيرا

ابن القسام يقول...

جزاكم الله خيرا يافندم ,,